Улоқ, кўпкари – Ўрта Осиё халқларининг қадимий оммавий, миллий ўйинларидан бири ҳисобланади. Асосан, ғалаба ва ҳосил байрамлари, тўй ва сайллар муносабати билан ўтказилади.

Куни кеча, Фарғона вилояти Фарғона туманида жойлашган Миллий гвардия "Чавандозлар мактаби" да Наврўз умумхалқ байрами арафасида Наманган, Андижон, Фарғона вилоятлари моҳир чавандозлари ўртасида улоқ-кўпкари бўлиб ўтди.

Қизғин ва муросасиз баҳсларга бой бўлган улоқ-кўпкари мусобақасида моҳир чавандозлар солимга қўйилган 1 та той, 2 та қора мол, 10 та қўй эчки, 50 га яқин қимматбаҳо совринлар учун баҳсларга киришдилар.

Эътироф этиш жоиз, мазкур тадбирга вилоятлардан турли ҳудудларидан ташриф буюрган 200 га яқин чавандозлар, шунингдек тадбирни томоша қилиш учун 1000 дан зиёд от спорти ишқибозлари, ёшлар, маҳаллий аҳоли вакиллари ҳамда спорт ихлосмандлари йиғилди.

Мусобақа давомида, Миллий гвардия "Қўриқлаш" бошқармаси томонидан камондан отиш спорт мусобақалари шунингдек, от устида кураш сингари миллий ўйинлар ўтказилиб, томошабинларда байрам арафасида юқори кайфият улашилди.

Мусобақалар якунига кўра ғолибликни қўлга киритган иштирокчилар, Миллий гвардия Фарғона вилояти бўйича бошқармаси ҳамда ҳомий ташкилотлар томонидан солимга қўйилган ютуқлар ва эсдалик совғалари билан тақдирландилар.